آپ یہاں ہیں
صفحہ اول > شناسائی > نجیب عالم سے شناسائی

نجیب عالم سے شناسائی

آج کے منظرنامہ کے مہمان ہیں اردو بلاگر جناب ” نجیب عالم “ صاحب ۔ آپ پیشہ کے لحاظ سے صحافی بھی ہیں اور اردو بلاگنگ بھی کرتے ہیں۔ آپ ” پردیسی“ کے نام سے بلاگ لکھتے ہیں۔
خوش آمدید !
کیسے مزاج ہیں ؟
@ الحمدللہ
اپنے بارے میں کچھ بتائیں ؟
@ سادہ سا بندہ ہوں جی ۔۔ نام نجیب عالم ، پردیسی ، ناجی اور شیخو سے نام سے بھی جانا جاتا ہوں۔
پیشہ ۔۔ بہت سے کام کئے۔۔آج کل جو ہے وہ صحافت اور ویب ڈویلپنگ ۔۔۔ حالانکہ دونوں شعبوں کا آپس میں کوئی میل نہیں مگر روٹی روزی کے چکر میں دونوں کر رہا ہوں۔
آپ کی جائے پیدائش کہاں ہے ؟ اور موجودہ رہائش کہاں ہے ؟
@ لاہور اور موجودہ رہائش بھی لاہور ہی میں ہے۔
اپنی تعلیم، پیشہ اور خاندانی پس منظر کے بارے میں کچھ بتائیں ؟
@ بی اے ،
پیشہ ، صحافت اور ویب ڈویلپنگ
سفید پوش بندے ہیں جی۔
اردو بلاگنگ کی طرف کب اور کیسے آنا ہوا ؟ آغاز کب کیا ؟
@ دو ہزار پانچ ۔۔۔ اردو محفل سے اس طرف بلاگنگ کی دنیا میں آیا ۔ بلاگنگ کی دنیا میں پردیسی بلاگ کے نام سے سب سے پہلے اردو یونیکوڈ قرآن پاک کے ترجمے کا آغاز کیا ۔۔۔ سا تھ ہی چولیں مارنے اور دل کی بھڑاس نکالنے لئے ایک عدد شیخو بلاگ کے نام سے اپنے دوسرے بلاگ کا آغاز بھی کیا۔
کیا مراحل طے کیے آغاز میں اور کس قسم کی مشکلات پیش آتی تھیں ؟
@ ویب کی زبان سے واقفیت کی بنا پر مجھے کوئی خاص مشکلات پیش نہیں آئیں ۔شروع میں لوگوں کو مفت بلاگ ،اردو کی مفت ویب سائٹ اور ورڈ پریس کے بے شمار سانچے ڈھال کر دئے ۔ بعد آزاں اسی کو کاروبار بھی بنایا اور الحمدللہ اس سے لا کھوں کمائے ۔۔۔ اور تاحال یہ سفر جاری و ساری ہے۔اب تو اسی کو ہم نے اپنا پیشہ بھی بنا لیا ہے۔
بلاگنگ شروع کرتے ہوئے کیا سوچا تھا؟ صرف بلاگ لکھنا ہے یا اردو بلاگنگ کو فروغ دینے کا مقصد پیش نظر تھا ؟
@ بلاگنگ شروع کرتے وقت صرف یہ سوچا تھا کہ اسلامی تعلیمات خصوصاً قرآن کی تعلیمات کو یونیکوڈ یعنی تحریری اردو میں زیادہ سے زیادہ عام کرنا ہے۔مگر بعد میں دنیا کے جھمیلوں اور ویب کی دنیا میں پیسہ کمانے کی خاطر ایسے راغب ہوئے کہ پردیسی بلاگ کا مشن ادھورا رہ گیا اور اب تک ادھورا ہے۔
کن بلاگرز سے متاثر ہیں اور کون سے بلاگز زیادہ دلچسپی سے پڑھتے ہیں ؟
@ پرانے بلاگرز سے ۔۔۔اور زیادہ تر انہیں کو میں اب تک پڑھتا بھی ہوں کیونکہ ان کی تحریروں میں جان ہے ، تجربہ ہے ایک سوچ ہوتی ہے جو سیدھے راستے کا پتہ دیتی ہے۔ ۔اب تو ماشااللہ نئے اور کچھ نوجوان بلاگرز بھی بڑی کمال کی تحریریں لکھ رہئے ہیں ۔
پرانے بلاگرز میں سے زکریا اجمل ،نبیل نقوی،جہانزیب اشرف،قدیر ملتان والے،شاکر عزیز،افتخار اجمل بھوپال،افضل صاحب میرا پاکستان والے،خاور کھوکھر،راجا افتخار خان،شعیب صفدر ، منیر احمد طاہر اور بد تمیز قابل ذکر ہیں ۔
درمیانی مدت اور آجکل کے نئے بلاگرز میں سب ہی اچھے ہیں ان کا اگر میں فرداً فرداً نام لوں تو میری یاداشت سے بہت سارے نام رہ جائیں گے جس سے آپ جیسا کوئی شہزادہ ناراض ہو سکتا ہے۔
لفظ ” بلاگ “ سے کب شناسائی حاصل ہوئی ؟
@ دوہزار تین اور چار کے درمیان ۔۔۔ زکریا اجمل کے ویب لاگ کو پڑھنے کے بعد۔
اپنے بلاگ پر کوئی تحریر لکھنی ہو تو کسی خاص مرحلے سے گزارتے ہیں یا لکھنے بیٹھتے ہیں اور لکھتے چلے جاتے ہیں ؟
@ کوئی خاص مر حلہ نہیں ۔۔۔ بس جس واقعہ یاسوچ پر لکھنا ہو تو بے دھڑک لکھ دیتا ہوں۔
کیا آپ سمجھتے ہیں کہ بلاگنگ سے آپ کو کوئی فائدہ ہوا ہے؟ یا کیا فائدہ ہوسکتا ہے؟
@ مجھے تو جو فائدہ ہوا ہے وہ زیادہ تر مالی ہے۔۔۔ اب لوگوں کو میری تحریروں سےکہاں تک یا کیا فائدہ ہوا ہے وہ تو وہی بتا سکتے ہیں۔
آپ کی نظر میں معیاری بلاگ کیسا ہوتا ہے ؟
@ جس پر آپ اپنی سوچ کا کھلے دل سے اظہار کریں ۔۔۔چاہے اس سوچ یعنی تحریر پر کوئی تبصرہ ملے یا نہ ملے۔ باقی اگر آپ معیاری بلاگ میں کسی قسم کے فیچر یا خوبصورتی کی بابت پو چھ رہے ہیں تو میری نظر میں ایک معیاری بلاگ میں اس کی کو ئی اہمیت نہیں ہے۔
آپ کے خیال میں کیا اردو کو وہ مقام ملا ہے، جس کی وہ مستحق تھی ؟
@ جی ہاں ،،، بہت زیادہ ۔۔۔ مگر ابھی اردو نے انٹرنیٹ پر بہت سی ترقی کی منازل طے کرنی ہیں ۔۔۔ یہاں میں اردو کی ترقی میں مین کردار ادا کرنے والوں کو خراج تحسین پیش کرتا ہوں ۔ جن میں اردو لائف کے شیخ امجد ، زکریا اجمل،نبیل نقوی،قدیر ملتانی، جہانزیب اشرف،امانت علی گوہر ۔۔ جس نے سب سے پہلے انپیج ٹو یونکوڈ اور یونیکوڈ ٹو انپیج کنورٹر بنایا ۔شارق مستقیم ۔۔۔ جس نے ونڈو ۹۸ اور ونڈو ایکس پی کے لئے سب سے پہلا اردو انسٹالر بنایا ۔۔ شارق مستقیم کی بدقسمتی اور ہماری ناالی کہ ہم اس کی صحیح تشہیر نہ کر سکے ۔
اردو کے ساتھ اپنا تعلق بیان کرنے کو کہا جائے تو کیسے کریں گے ؟
@ بہت زیادہ ۔۔۔ میں خود کو ویب کی دنیا میں سب سے پہلے اردو ویب سائٹ بنانے والا بھی کہتا ہوں ۔۔۔ مگر یہ بھی حقیقت ہے کہ میں نے شروع میں تو مفت کام کیا مگر بعد آزاں میں نے اسے اپنا کاروبار بنایا ۔ جس کی وجہ سے میں نے اردو کی دنیا میں کبھی کوئی کریڈٹ نہیں لیا۔ اور نہ ہی لینا چاہتا ہوں کیونکہ میرا کریڈٹ وہ پیسہ تھا جو میں نے کمایا یا کما رہا ہوں۔
آپ کے خیال میں جو اردو کے لیے کام ہو رہا ہے کیا وہ اطمینان بخش ہے ؟
@ جی بالکل اطمینان بخش ہے۔
آنے والے پانچ سالوں میں اپنے آپ کو اور اردو بلاگنگ کو کہاں دیکھتے ہیں؟
@ اس میں پروفیشنل ازم آ جائے گا ۔۔ سچے بلاگرز صرف نام کے رہ جائیں گے۔
کسی بھی سطح پر اردو کی خدمت انجام دینے والوں اور اردو بلاگرز کے لیے کوئی پیغام؟
@ اردو کی خدمت انجام دینے والوں کو بس اتنا کہوں گا کہ اردو کے لئے نیک نیتی سے کام کریں چاہے وہ کام پیسے لے کر کریں۔
اردو بلاگرز کے لئے اتنا کہوں گا کہ جو آپ سوچتے ہیں وہ لکھیں اور کھل کر لکھیں ۔۔ اگر ڈر کر لکھنا ہے تو بلاگنگ چھوڑ کر فیس بک پر چیٹ کریں۔
بلاگ کے علاوہ دیگر کیا مصروفیات ہیں؟
@ بیوی کی خدمت کرنا۔
آپ کی زندگی کا مقصد کیا ہے ،کوئی ایسی خواہش جس کی تکمیل چاہتے ہوں؟
@ زندگی کا مقصد ۔۔۔ سیدھے راستے پر چلنا ۔۔ مگر بار بار بھٹک جاتا ہوں ۔۔۔ الحمدللہ کوئی خواہش نہیں ۔۔جو جو خواہش کی اللہ تعالیِ نے اسے پورا کر دیا ۔
اب کچھ سوال ذرا ہٹ کے۔۔۔ 
پسندیدہ: 
1۔ کتاب ؟
@ قرآن ۔۔ مگر نا اہل ہوں ،، کم پڑھتا ہوں
2۔ شعر ؟
@ احساس کے انداز بدل جاتے ہیں ورنہ
آنچل بھی اک تار سے بنتا ہے کفن بھی
3۔ رنگ ؟
@ سفید
4۔ کھانا ؟
@ سب کھا لیتا ہوں
5۔ موسم ؟
@ بہار
6۔ ملک ؟
@ پاکستان
7۔ مصنف ؟
@ سعادت حسن منٹو
8۔ گیت؟
@ موڈ اور موسم کے لحاظ سے سنتا ہوں
9۔ فلم ؟
@ امراوّ جان ادا 
غلط /درست: 
1۔ مجھے بلاگنگ کرنا اچھا لگتا ہے ۔
@ درست
2۔ مجھے اکثر اپنے کئے ہوئے پر افسوس ہوتا ہے؟
@ غلط
3۔ مجھے کتابیں پڑھنے کا بے حد شوق ہے ؟
@ غلط
4۔ مجھے سیر و تفریح کرنا اچھا لگتا ہے ؟
@ درست
5۔ میں ایک اچھا دوست ہوں ؟
@ درست
6۔ مجھے جلد ہی غصہ آجاتا ہے ؟
@ غلط
7۔ میں بہت شرمیلا ہوں ؟
@ غلط
8۔ مجھے زیادہ باتیں کرنا اچھا لگتا ہے ؟
@ غلط 
منظرنامہ کے لیئے کوئی تجویز دینا چاہیں گے ؟
@ انٹرویو سیکشن کو اگر ویڈیو نہیں تو آڈیو میں بھی ہونا چاہئے ۔
آخر میں کوئی خاص بات یا پیغام ؟
@ آپس میں بھائی چارے سے رہو اور پاکستان سے محبت کرو ۔
اپنا قیمتی وقت نکال کر منظرنامہ کو انٹرویو دینےکے لیئے آپ کا بہت بہت شکریہ
@ آ پ کا بھی شکریہ۔
محمد بلال خان
محمد بلال خان کمپیوٹر سائنس کے طالب علم ہیں۔پیشے کے لحاظ سے ویب ڈویلپر ہیں۔ عام موضوعات کے علاوہ ٹیکنالوجی اور انٹرنیٹ سے متعلق سافٹ ویئر کے بارے میں بلاگ نامہ کے عنوان سے اردو بلاگ لکھتے ہیں۔ منظرنامہ انتظامیہ کا حصہ ہیں۔
http://www.mbilalkhan.pk/blog

8 تبصرے:

  1. آنے والے پانچ سالوں میں اپنے آپ کو اور اردو بلاگنگ کو کہاں دیکھتے ہیں؟
    @ اس میں پروفیشنل ازم آ جائے گا ۔۔ سچے بلاگرز صرف نام کے رہ جائیں گے۔

    سب سے سچا، حقیقت پسندانہ اور کھرا جواب یہی ہے۔۔۔ بہت اچھا تجزیہ ہے جناب پردیسی صاحب کا۔

  2. نجیب عالم بھائی بڑے نفیس آدمی ہیں اس لئے ان کی باتیں بھی ماشا ء اللہ نفیس ہیں بحر حال ایک سچ ان کی زبان سے پہت اچھا لگا کہ بیوی کے خدمت گار ہیں ۔ اللہ پاک دونوں کو خوش و خرم رکھے ( آمین)

  3. نجیب بھائی سے ملاقات بھی ہو گئی اور تعارف بھی لیکن ان کا انٹرویو ابھی پڑھ رہا ہوں
    کھرے دل کے آدمی ہیں محبت کرنے والے اور یاروں کے یار
    آڈیو ویڈیو والا ان کا آئیڈیا پسند آیا اب جو شناسائی کی ذمہ داری سنبھال رہے ہیں تو اس پہ غور کرتے ہیں

اپنا تبصرہ تحریر کریں

اوپر