اردو بلاگز ایک بلاگ ایگریگیٹر یا جمیع بلاگ ہے ۔جس کا مقصد اردو بلاگستان کی تازہ ترین تحاریر کوایک صفحہ پر اکٹھا کرنا، اردو بلاگستان کے صارفین میں اضافہ کرنا اور اردو بلاگنگ کو فروغ دینا ہے۔ بیشتر انٹرنیٹ صارفین ہر بلاگ پر جانے کی بجائے فقط بلاگ ایگریگیٹر پر آتے ہیں اگر انہیں کوئی تحریر پسند آئے تو مکمل تحریر پڑھنے کے لیے وہ اس بلاگ پر چلے جاتے ہیں، یوں اردو بلاگران کو روزانہ کی بنیاد پر کئی وزٹر بذریعہ ایگریگیٹر حاصل ہوتے ہیں۔ ایگریگیٹر کے مرکزی صفحہ پر چونکہ آپ کی تحریر کا ربط بھی ہوتا ہے یوں آپ کے بلاگ کی سرچ انجن رینکنگ میں اضافہ ہوتا ہے۔اردو بلاگز کی ایک خصوصیت جو اسے دوسرے بلاگ ایگریگیٹر زسے ممتاز کرتی ہے وہ یہ ہے کہ اس میں اردو بلاگنگ کمیونٹی کی نہ صرف تازہ تحاریر بلکہ ماضی کی تحاریر بھی آرکائیو کی صورت میں موجود رہتی ہیں۔
گراویٹر سپورٹ کیا ہے۔
گراویٹر کو اردو میں گریویٹر بھی پڑھ سکتے ہیں، اسکا مطلب ہے گلوبلی ریکگنائزڈ ایویٹر Globally recognized avatar۔ اگر کسی بلاگ میں گریویٹر کی سہولت ہو تو جب آپ اس بلاگ پر تبصرہ کرتے ہیں تو آپ کا گریویٹر بھی آپ کے نام کے ساتھ ظاہر ہوتا ہے۔ اردو بلاگز میں گریویٹر کی سہولت بھی دستیاب ہے۔ جیسے ہی آپ کے بلاگ سے کوئی تحریر اردو بلاگز پر ظاہر ہوگی تو ساتھ میں آپ کا گریویٹر بھی ظاہر ہو گا۔ چونکہ اردو پڑھنے والے تمام بلاگرز کو ان کے ناموں سے نہیں جانتے۔کسی بھی بلاگ پر تبصرہ کرتے وقت تمام بلاگران کے گریویٹر ظاہر ہوتے ہیں یوں ہر بلاگر کی ایک الگ پہچان قائم ہو جاتی ہے اسی پہچان کا فائدہ اٹھاتے ہوے اردو بلاگز پر تمام فیڈز کو گراویٹر سے منسلک کیا گیا ہے۔ اس سے فائدہ یہ ہو گا کہ پڑھنے والوں کو فوری طور پر کسی بھی بلاگر کو پہچاننے میں مسئلہ نہیں ہو گا۔
موبائل کے لیے مخصوص سانچہ
آج کل موبائل ڈیوائسز کا دور ہے ، اچھی سے اچھی موبائل ڈیوائسز اور سمارٹ فونز مارکیٹ میں آرہے ہیں جن میں ویب کی زیادہ سے زیادہ سپورٹ شامل ہے، اردو اور عربی زبان میں بلاگ اور اخبارات پڑھے جا سکتے ہیں، اور تو اور فیس بک، یو ٹیوب ٹویٹر وغیرہ کی ایپلیکیشنز بھی دستیاب ہیں جن سے برائوزر کھولے بغیر آپ اپنا سٹیٹس اپ ڈیٹ کر سکتے ہیں، تصاویر اور ویڈیوز اپ لوڈ کر سکتے ہیں۔چونکہ موبائل پر یہ سب کرنے کے لیے تھری جی یا وائرلیس سے ڈیٹا درامد کروانا پڑتا ہے جو بعض صورتوں میں کافی مہنگا ہوتا ہے اور موبائل کی ننھی سی مشین کو مد نظر رکھتے ہوے ویب پیجز کا سائز چھوٹا ہونا ضروری ہے۔ موبائل تھیم ہمارا یہ مقصد باآسانی پورا کرتی ہے۔ اردو بلاگز پر موبائل تھیم بھی انسٹا ہے۔ تاہم موبائل تھیم میں مکمل تحاریر کی بجائے صرف تحاریرکے عنوان ظاہر ہوتے ہں اور نیچے مصنف کا نام، تحریر کے شائع ہونے کی تاریخ اور وقت۔ یہ تھیم نوکیا فورمز کی تیار کردہ ہے اوربیشتر نوکیا سیٹس پر باآسانی دیکھی جا سکتی ہے۔ دیگر سیٹ جیسے آئی فون اور وینڈوز موبائل پر بھی یہی تھیم ظاہر ہو گی۔
شماریات
• اس وقت اردو بلاگز پر لگ بھگ اٹھانوے اردو بلاگ موجود ہیں۔
• ہر بلاگ کو ڈیڑھ گھنٹہ بعد پیش رفت کے لیے جانچا جاتا ہے، آیا نئی تحریر موجود ہے کہ نہیں۔
• اس وقت اردو بلاگز پر اٹھارہ سو1800 سے زائد اردو تحاریر ہیں جو متعلقہ اردو بلاگران کی ملکیت ہیں۔
• یہ شماریات مستقبل کے ساتھ ساتھ تبدیل ہو سکتی ہے۔
اردو بلاگز ایگریگیٹر کےلیے تکنیکی کام بلاگر یاسر عمران نے کیا اور سپانسرشپ پاک نیٹ کی انتظامیہ نے فراہم کی۔ اردو بلاگز پر شمولیت کا صفحہ یہ رہا۔
امید کرتے ہیں کہ اردو بلاگز دن بدن ترقی کرے گا اور اردو بلاگزکی انتظامیہ تکنیکی اور دیگر معاملات میں اردو بلاگز کی بہتر دیکھ بھال کر سکےگی۔

کمپیوٹر پر اردو لکھنے یا پڑھنے میں اب کوئی عظیم ٹیکنالوجیکل رکاوٹیں حائل نہیں ہیں۔ اردو لکھنا اور پڑھنا آسان ہے۔ جو بھی چاہے وہ ذرا سی تلاش سے ایسے دسیوں مضامین اردو اور انگریزی زبانوں میں ڈھونڈ سکتا ہے جس میں کمپیوٹر پر اردو لکھنے پڑھنے، فونٹ انسٹال کرنے اور کی بورڈ لے آؤٹ تبدیل کرنے تک کے طریقے موجود ہیں۔یہ بحث کہ اردو لکھنے کو آسان تر بنایا جانا چاہئے محض کمیونٹی کا وقت ضائع کرتی ہے۔ جو اردو لکھنا چاہے وہ اب باآسانی اردو لکھ، پڑھ اور شائٰع کرسکتا ہے۔ تاہم جو لوگ اردو لکھنے کی کوشش کررہے ہیں انہیں ترغیب، حوصلہ افزائی اور رہنمائی کی ضرورت پڑتی ہے۔ تو اس کے لئے ایک مناسب فورم پہلے سے موجود ہے جہاں سوالات کے جوابات، موضوعات کا ڈھیر، ڈاؤنلوڈز کا ذخیرہ اور اردو کمپیوٹر اپلیکشن پروگرامنگ کے ماہرین موجود ہیں اور اگر آپ محفل کا جائزہ لیں تو آپ دیکھیں گے کہ کافی سارے لوگوں نے وہاں سے اپنے کمپیوٹر اور ویب پر اردو لکھنے کی رہنمائی اور ترغیب پائی ہے۔ ٹیکنالوجیکل رہنمائی کے حوالے سے اردو کمیونٹی کی سمت درست ہے اور رفتار سبک۔ اصل مسئلہ کچھ اور ہے۔

اردو بلاگنگ کی غیر مقبولیت کی اصل وجہ اس کا غیر معیاری ہونا ہے۔

جب میں کوئی اچھی تحریر پڑھتا ہوں، کوئی اچھی بات سنتا ہوں، کوئی اچھا گیت یا کوئی اچھا جملہ سنتا ہوں تو میرا دل چاہتا ہے کہ میں اسے یاد کرلوں، اسے دوسروں کے ساتھ بانٹوں، یا اس جیسی اچھی چیزیں کہنے کی کوشش کروں۔ اکثر لکھنے والوں کو ترغیب پڑھنے سے ہی ملتی ہے۔ اگر ہمارے لکھے ہوئے مضامین قاری کے دل میں کسی قسم کی تحریک بیدار نہیں کرتے، انہیں کچھ کہنے پر اکساتے نہیں ہیں یا انہیں ترغیب نہیں دیتے تو ہماری تحریر اچھی نہیں ہے۔ میرا خیال ہے کہ اگر ہم لوگوں کو اردو بلاگنگ کی ترغیب دینا چاہتے ہیں تو ہمیں اچھا لکھنا ہوگا اور اپنے معیار کو بلند کرنا ہوگا۔ ہر اردو بلاگر کو یہ اپنی انفرادی ذمہ داری سمجھنا چاہئے اور خود ہی اپنی تحریر کو بہتر بنانے کی کوشش کرنا چاہئے۔

میں اس قسم کی کوئی اہلیت نہیں رکھتا کہ معیار طے کروں۔ تاہم کامن سینس اور لکھنے کے فن پر تھوڑا بہت پڑھ لینے کے بعد چند سادہ سی تجاویز گوش گزار کرنا چاہتا ہوں اس امید پر کہ وہ پڑھنے والوں کو اور مجھے خود کو بہتر لکھنے میں مدد دیں گی۔ ان تجاویز کے علاوہ میں یہ مشورہ دونگا کہ انٹرنیٹ پر بہتر لکھنا سکھانے کے کئی ویب سائٹ موجود ہیں ان سے فائدہ اٹھائیں۔

اچھا لکھنے سے مراد یہ نہیں کہ آپ اردو ادب کے اساتذہ کی نقالی کریں۔ اگر آپ مزاح لکھ رہے ہیں تو ضروری نہیں کہ آپ کا انداز مشتاق یوسفی، کرنل شفیق الرحمن، پطرس بخاری جیسا ہو۔ اگر آپ سیاسی اور معاشرتی مضامین پر لکھ رہے ہیں تو یاد رکھیں آپ کا بلاگ روزنامہ ایکسپریس نہیں ہے۔ جدت اپنائیں اور اپنے خود کے انداز میں لکھیں۔ اپنی تحریر کو اپنے تشخص کا لبادہ پہنائیں اور اسی کو سنوارنے اور سدھارنے کی کوشش کیا کریں۔

بے تکے پن کو بھی خوبصورتی اور مہارت سے پیش کریں۔ بے مقصدیت کو کبھی بھی رقم بند نہیں کیا جاسکتا اس لئے یاد رکھیں کہ چاہے آپ کچھ بھی لکھ رہے ہوں، وہ بے مقصد ہو ہی نہیں سکتا ہاں بھونڈے پن سے وہ ناقابل فہم ضرور ہوسکتا ہے اور لوگ اسے پڑھنا پسند نہیں کریں گے اور اگر کوئی چیز پڑھے جانے کے قابل نہیں تو اسے لکھا بھی نہیں جانا چاہئے۔ اپنے الفاظ کی قدر سمجھیں اور انہیں سمجھداری سے استعمال کریں۔

نئے خیالات لائیں اور اردو کو دقیانوسیت کے بوسیدہ غلاف سے باہر نکالیں۔

دلچسپ اور رنگارنگ خیالات پر طبع آزمائی کریں۔

دل سے لکھیں مگر دماغ سے اسے درست کریں۔ لکھتے ہی پوسٹ شائع نہ کردیا کریں۔ اسے پہلے خود پڑھا کریں اس کی نوک پلک درست کیا کریں۔ جملوں کو چست، خیال کو دلچسپ اور بیان کو آسان بنانے کی کوشش کیا کریں۔

ویب ایک مختلف میڈیم ہے۔ یہاں لوگوں کے پاس زیادہ وقت نہیں ہوتا۔ ایک طرف انہوں نے آپ کو مضمون کھولا ہوتا ہے تو دوسری طرف فیس بک پر کسی پری چہرہ کی پروفائل، دوسرے ٹیب میں جی میل اور تیسرے ٹیب پر یوٹیوب پر کوئی مزیدار ویڈیو۔ آپ ان کے قیمتی وقت کو ضائع نہ کریں اور اپنی تحریر کو بلاوجہ طول نہ دیں۔ لوگ طویل تحاریر میں دلچسپی کھودیتے ہیں اور مکمل مضمون پڑھے بغیر ہی کہیں اور متوجہ ہوجاتے ہیں۔

اگر طویل مضمون ہی لکھنا ہے تو زیادہ سے زیادہ پیرا گراف بنائیں۔ چند بلاگر ایک ہی پیراگراف میں لمبی لمبی پوسٹس لکھ دیتے ہیں جنہیں پڑھنا بہت مشکل ہوتا ہے۔

بہتر لکھنے کی چند تجاویز کے بعد اب کچھ اور باتیں۔

خوبصورتی سے زیادہ اہم بات قابلیت استعمال ہے۔ اکثر اردو بلاگ اس بات کا خیال نہیں رکھ پاتے۔ یوں ان کے قاری کو یہ تاثر ملتا ہے کہ وہ غیر سنجیدہ لوگوں کا ٹولہ ہیں۔ مثال کے طور پر آپ کا بلاگ تمام جدید ویب براؤسروں پر درست دکھنا چاہئے۔ آپ کے بلاگ کو جلدی کھلنا چاہئے۔ اور اس کی نیوی گیشن سادہ اور قابل فہم ہونا چاہئے۔ اگر کسی کے کمپیوٹر میں کوئی بھی اردو فونٹ نہیں ہے تب بھی اسے آپ کا سائٹ پڑھے جانے کی حالت میں نظر آنا چاہئے۔

تھیم اردوانے والے حضرات سے گذارش ہے کہ وہ معیاری تھیم ترجمہ کریں۔ اردوائے گئے اکثر تھیم غیر معیاری ہوتے ہیں۔ اردو بلاگنگ بار بار تھیم بدلنے کا نام نہیں ہے۔ دس بارہ معیاری اردو تھیم کافی ہیں۔ اور یہ زیادہ بہتر ہوگا کہ کمیونٹی بلاگر کے اردو ٹیمپلیٹس پر توجہ دیں، صرف ورڈ پریس ہی ایک بلاگنگ ٹول نہیں ہے۔

ویب پیڈ، گوگل ٹرانسلٹریشن اور اس قسم کے دیگر ٹولز کی افادیت اپنی جگہ مگر کمپیوٹر کی اپنی سپورٹ کے ذریعے اردو لکھنے کو فروغ دیا جائے ۔ کیونکہ یہ درست طریقہ ہے، اس کی سہولت تمام آپریٹنگ سسٹمز میں موجود ہے، اور اس کے بغیر اردو کی ترقی ممکن نہیں ہے۔

اردو کے فری ویب ہوسٹس کے ناقابل اعتبار ہونے کی وجہ سے لوگوں کو بلاگر یا ورڈپریس ڈاٹ کام پر بلاگنگ شروع کرنے کا مشورہ دیا جانا چاہئے۔ بلاگر کو اکثر اردو کمیونٹی نظر انداز کردیتی ہے حالانکہ اس میں زبردست اردو سپورٹ موجود ہے۔ یہ مفت ہے اور کافی قابل اعتبار ہے۔ بعد ازاں جب لکھنے والے کو بلاگنگ کا تھوڑا تجربہ ہوجائے تو وہ خود کہیں ہوسٹنگ کا انتظام کرسکتا ہے۔

ہر اردو بلاگر کے بلاگ پر ایک صفحہ رابطے کا ہونا چاہئے جس کے ذریعے لوگ انہیں ای میل کرسکیں۔ اور جب کوئی آپ سے پوچھے کہ وہ اپنا اردو بلاگ کیسے شروع کریں تو انہیں اردو محفل کا پتہ دیا کریں۔

اردو بلاگنگ کی ترقی کے لئے میرے اس مضمون شامل تجاویز کا خلاصہ یہ ہے کہ۔

ا۔ بہتر لکھیں، نیا لکھیں، ذمہ داری کے ساتھ لکھیں اور جو بھی لکھیں اس کا پڑھا جانا آسان بنائیں۔
2۔ ورڈ پریس کے علاوہ بلاگر پر بھی نظر کرم کریں۔ یہ مفت بھی ہے اور قابل اعتبار بھی۔
3۔ ترغیب دیں، رہنمائی کریں۔ مگر لوگوں کو مفت خدمات فراہم نہ کریں۔

میں دو مختلف بلاگز پر یہ پلگ‌ان استعمال کر رہا ہوں:

• سوشل پرائیویسی: بلاگ کے مخلتف حصوں کو پرائیویٹ رکھنے کے لئے۔
• سلم‌باکس2: تصاویر بڑے سائز میں صفحے کے سامنے ہی دکھانے کو۔
• اباؤٹ می: میرے مختلف لنکس سائڈبار میں۔
• ایمزون فیڈ: کسی بھی پوسٹ سے متعلقہ ایمزون کے روابط۔
• اے‌وی‌این ایمزون: میری ایمزون وش‌لسٹ کے لئے۔
• کولاپسنگ آرکائیوز: کہ مہینوں کی آرکائیو کم جگہ لیں۔
• کنٹیکٹ فارم 7: رابطہ فارم
• ایزی ایڈسنس: گوگل ایڈسنس کے لئے۔
• ایفیشنٹ ریلیٹڈ پوسٹس: کسی بھی پوسٹ سے متعلقہ دوسری پوسٹس کے لنک۔
• گوگل اینلیکیٹر: گوگل analytics اکاؤنٹ کے لئے۔
• گوگل ایکس‌ایم‌ایل سائٹ‌میپس: گوگل اور یاہو سرچ کے لئے سائٹ میپ
• لائف‌سٹریم: میرے سوشل سائٹس سے فیڈز
• نیکس‌جین گیلری: تصاویر کے لئے۔
• ناؤ ریڈنگ ری‌لوڈڈ: کتابوں کے ریویو کے لئے۔
• پیج لنکس ٹو: صفحات کو نئے لنک دینے کے لئے
• ریکمنڈڈ ریڈنگ: گوگل ریڈر کے شیئرڈ آئٹم دکھانے کو۔
• رچ ٹیکسٹ بائیوگرافی: اپنا پروفائل میں تعارف ایچ‌ٹی‌ایم‌ایل کے ساتھ۔
• آر‌پی‌ایکس: تاکہ تبصرہ‌نگار فیس‌بک، اوپن‌آئ‌ڈی یا ایسے دوسرے سسٹمز سے لاگ‌ان کر سکیں۔
• سرچ اینڈ ریپلیس: ڈیٹابیس میں کوئ بھی ڈیٹا سرچ اور ریپلیس کرنے کو۔
• سوشیبل: سوشل بک‌مارکنگ سائٹس پر بلاگ سے مواد شیئر کرنے کی سہولت قارئین کے لئے۔
• تھریڈ ٹویٹر: میری ٹویٹر فیڈ اور جوابات بلاگ پر۔
• ایکس‌ایم‌ایل گوگل میپس: گوگل کے نقشے بلاگ پر۔ اوپر گیلری پلگ‌ان کے ساتھ استعمال کرتے ہوئے تصاویر بھی نقشے پر دکھائ جا سکتی ہیں۔
• ڈبلیو‌پی‌-‌سنٹیکس جو گیشی انجن کے استعمال سے پوسٹس میں شامل کوڈ کو ہائ‌لائٹ کرتا ہے۔
• میرا لکھا ہوا پلگ‌ان ناؤ واچنگ جس کا مقصد فلموں کا ریویو ہے۔

اگر آپ ورڈپریس استعمال کر رہے ہیں تو اس کے کونسے پلگ‌ان آپ کے استعمال میں ہیں؟

یہ مکالمات کئی بار دہراے گئے۔ اب مختلف لوگوں کے مختلف جواب۔۔۔ کسی نے اُسی وقت اپنی آمد کا وعدہ کیا، کسی نے ٹال دیا۔ محمد علی مکی، فہیم، ابوکاشان، امانت علی گوہر، نعمان یعقوب، م۔م۔مغل، عدنان زاہد وغیرہا سے بات ہوئی۔ بعدازاں علمدار حسین اور فاتح الدین بشیر سے بھی رابطہ ہوا لیکن فاتح اسلام آباد میں ہونے کے باعث شرکت نہیں کرسکتے تھے اور علمدار حسین کے ہاں گذشتہ دنوں بیٹے کی ولادت کی وجہ سے وہ آنے کا وعدہ نہیں کرسکے (علمدار حسین کو منظرنامہ کی جانب سے پہلی اولاد کی بے حد مبارک باد۔ اللہ تعالیٰ اس بچے کو اپنے ماں باپ کے لیے مبارک کرے۔ آمین)۔

اگلے دن کتاب چہرہ (فیس بک) اور منظرنامہ پر عیدملن کی تشہیر کی گئی تاکہ دیگر احباب سے بھی رابطہ کیا جاسکے۔ یہ دعوت صرف اردو بلاگرز تک محدود نہیں تھی بل کہ انٹرنیٹ پر تمام اردو کمیونٹی کو جس تک اتنے محدود وقت میں دعوت پہنچنا ممکن ہوسکا، آمد کی دعوت دی۔ فرحان دانش حیدرآباد میں موجودگی کے باعث شرکت کے حوالے سے مشکوک رہے، عنیقہ ناز کسی ضروری کام کے باعث شرکت کرنے سے معذرت کرگئیں۔ کچھ لوگوں کو اُن کے ناز نخروں نے تقریب میں شرکت سے روکے رکھا.

سنیچر کی شام عید ملن کے لیے یہ نام حتمی تھے:
1۔ فہیم اسلم
2۔ محمد علی مکی
3۔ م م مغل
4۔ عدنان زاہد
5۔ نعمان یعقوب
6۔ ہارون ادریس

اور تین میزبان اردو بلاگر:
7۔ شعیب صفدر
8۔ ابوشامل
9۔ عمار ابنِ ضیا

جب کہ تین مزید حضرات کی شرکت متوقع تھی:
10۔ ابوکاشان
11۔ طارق راحیل
12۔ فرحان دانش

عید ملن کا وقت سہ پہر 3بجے رکھا گیا۔ مہمانوں کی آمد کے لیے میزبانوں کو کچھ انتظار کرنا پڑا۔ سب سے پہلے ابوشامل کے ماموں زاد بھائی اسید اللہ کیہر پہنچے۔ اسید عمر میں کم ہیں لیکن معلومات کافی رکھتے ہیں اور اردو بلاگنگ کا ارادہ ہے۔ ان کے بعد فہیم اپنی موٹرسائیکل پر محمد علی مکی کو لیے پہنچے۔ باقی مہمانوں کا انتظار طویل سے طویل تر ہوتا چلا گیا۔چار بجے عدنان زاہد سے رابطہ کیا گیا تو پتا چلا کہ موصوف راستے میں ہیں۔ نعمان یعقوب جو اپنے ساتھ ایک ساتھی ہارون ادریس اور براہِ راست کوریج کے لیے لیپ ٹاپ لانے والے تھے، اُن سے رابطہ کیا گیا تو انہوں نے ذرائعِ آمد و رفت نہ ملنے کا کہہ کر آنے سے معذرت کرلی جس سے کافی مایوسی ہوئی۔ م م مغل سے بات کی گئی تو پتا چلا کہ اُن کی بھاوج کا انتقال ہوگیا ہے اس لیے وہ نہیں آسکیں گے۔ (اِناللہ وانا الیہ راجعون)

یہ صورتِ حال میزبانوں کے لیے کافی مایوس کُن تھی لیکن بہرحال جو قدرت کو منظور۔ مہمانوں کے انتظار اور گپ شپ کے سبب دوپہر کے کھانے کے لیے شام ساڑھے پانچ بجے تیاری کی گئی۔ کھانے کا انتظام تینوں میزبانوں کے تعاون سے کیا گیا تھا جب کہ ابوشامل نے کھانا بنوانے کی اضافی ذمہ داری قبول کرتے ہوے اپنی زوجہ محترمہ سے کھانا تیار کروایا تھا جو واقعی بہت ذائقے دار تھا (جزاک اللہ)۔

چوں کہ یہ عید ملن تھی اس لیے اس میں گفت گو کا کوئی خاص ایجنڈا نہیں تھا اس کے باوجود گپ شپ میں زیادہ تر زیرِ بحث اردو سے منسلک کوئی نہ کوئی موضوع رہا۔ ابوشامل نے کہا کہ انگریزی بلاگرز کے اس لحاظ سے مزے ہیں کہ اُن کو اپنی جیب سے کچھ خرچ نہیں کرنا پڑتا بل کہ ان کو تو ہر چیز پر اسپانسرز مل جاتے ہیں، بلاگ پر گوگل ایڈسینس ان کو رقم دیتا ہے جب کہ اردو بلاگرز کی سب سے بڑی بات یہ ہے کہ وہ کسی لالچ کے بغیر لکھتے ہیں اور اپنی جیب سے خرچ کرتے ہیں۔ عمار ابنِ ضیا نے اس میں یہ اضافہ کیا کہ انگریزی بلاگرز پہلے سے تخلیق شدہ ایک دنیا سے فائدہ اُٹھارہے ہیں اور اُردو بلاگرز اپنی دنیا خود تخلیق کررہے ہیں۔ ابوشامل نے اس موقع پر سر علامہ ڈاکٹر محمداقباؔل کا مصرع دہرایا کہ
اپنی دنیا آپ پیدا کر اگر زندوں میں ہے

اُردو وکی پیڈیا کا تذکرہ نکلا تو محمد علی مکی کافی جذباتی نظر آے اور انہوں نے غصے میں اردو وکی پیڈیا کو ٹھیک ٹھاک سنائیں لیکن دلائل کے ساتھ۔ اس کی ایک مثال انہوں نے وکی پیڈیا پر وکالت کو محاماہ لکھنا بھی پیش کی۔ اس موضوع پر بھی خاصی بات چیت رہی۔ اردو لائبریری کے حوالے سے فہیم نے اردو محفل کے قیصرانی کی تعریف کی جنہوں نے بے حد خلوص کے ساتھ کام کیا تھا لیکن ان کی حوصلہ افزائی نہیں کی گئی۔

ملاقات میں مشترکہ اردو بلاگ پر بھی کچھ گفتگو ہوئی جس پر جلد پیش رفت کا امکان ہے۔ آخرکار رات ساڑھے آٹھ بجے یہ نشست تمام ہوئی. (امید ہے کہ جلد ہی تصاویر بھی جاری کی جاسکیں گی).

پہلے دن کا آغاز 15 اگست سے ہوا.

1- یوم بچپن (15 تا 16 اگست)

15 اور 16 اگست کو اردو بلاگرز “یومِ بچپن” منائیں گے. یہ مکمل طور آپ پر منحصر کرتا ہے کہ آپ اس دن کو کیسے مناتے ہیں. آپ اپنے بچپن کی تصاویر پوسٹ کر کے یا اپنے بچپن کا کوئی یادگار واقعہ ہم سب کے ساتھ شئیر کر سکتے ہیں.

دوسرا دن یوم ٹیگ تھا، لیکن میرا خیال ہے اسے تقریباً آخر میں رکھتے ہیں، جب تک کوئی اس کے سوال بنا لے گا. اس لیے اب دوسرا دن “یومِ تعلیم” مناتے ہیں.

2- یومِ تعلیم (17 تا 18 اگست)

یعنی اسکول ، کالج ، یونیورسٹی یا اردگرد سے تعلیمی حوالے سے کوئی سی بھی عام سی بات ، خیال یا منفرد یاد اپنے بلاگ پر شیئر کر سکتے ہیں اور اگر یوم تعلیم کو مکمل سنجیدہ شکل دینا چاہیں تو تعلیم کے حوالے سے کوئی موضوع رکھا جا سکتا ہے جس پر سب لکھیں ۔ موضوع میں آپ “اپنے ملک کے تعلیمی نظام” پر بھی لکھ سکتے ہیں یا پھر “تعلیمی نظام کو بہتر بنانے کی تجاویز” پر بھی لکھا جا سکتا ہے.

3. اردو بلاگنگ (19 تا 20 اگست)

تیسرے دن ہم اردو بلاگنگ کے حوالے سے دن رکھ سکتے ہیں. اردو بلاگ دنیا کو آپس میں مربوط کرنے کے لیے ڈسکشن ڈے رکھنا چاہیے اردو بلاگ دنیا کے مسائل کو فوکس کیا جائے۔ ۔ ۔ تمام بلاگ دنیا کا بہتر باہمی رابطہ ۔ ۔ ۔ کیا اردو بلاگ دنیا کو کسی ضابطہ اخلاق کی ضرورت ہے ؟ اردو بلاگنگ سے متعلق آپ کچھ بھی لکھنا چاہیں تو اپنے بلاگ پر لکھ سکتے ہیں.

4- یومِ باورچی خانہ (21 تا 22 اگست)

سب بلاگرز کو کھانے پینے سے کچھ زیادہ ہی دلچسپی ہے تو سب بلاگرز کوئی سی بھی ایک ڈش خود بنائیں اور اس کی ترکیب اور تصویر شیئر کریں بلاگ پر۔ ۔ ۔ اور یہ بھی بتا سکتے ہیں کہ اس ڈش کو چکھنے اور کھانے والوں پر کیا کچھ بیت گئی یا اس کے علاوہ کچن سے متعلق کوئی بھی واقعہ.

5. یومِ مزاح (23 تا 24 اگست)

اس دن بلاگرز کوئی مزاحیہ تحریر اپنے بلاگ پر لکھیں گے.

6. یومِ ٹیگ (25 تا 26 اگست)

بلاگرز سے شناسائی سے متعلق ایک مختصر سا سوال نامہ ہو اور بلاگرز ایک دوسرے کو اس دن ٹیگ کریں. (اگر کوئی ٹیگ سوال نامہ بنائے تو وہی اس دن اپنے بلاگ سے اس کا آغاز کر دے.)

7. یومِ فوٹو گرافی (27 تا 28 اگست).

اس دن فوٹوگرافی کا کوئی تھیم بھی بلاگرز کو دیا جا سکتا ہے. یا پھر آپ کے ذہن میں جو بھی تھیم آئے، اس سے متعلقہ تصاویر اپنے بلاگ پر پوسٹ کر دیں

8- یومِ ٹیکنالوجی (29 تا 31 اگست)

29 تا 31 اگست کو ہم یومِ ٹیکنالوجی بھی منایا جا سکتا ہے. یعنی ماہر لوگ نئے آنے والے بلاگرز کے لیے تکنیکی مدد کے لیے مواد اپنے بلاگ پر پوسٹ کریں. تھیمز اردوا کر پیش کرنا، یا ایک بلاگ کو کیسے سیٹ اپ کیا جاتا ہے…جیسے موضوعات آپ اپنے بلاگ پر لکھ سکتے ہیں. یا اگر آپ پہلے سے کوئی ایسا ٹیوٹوریل لکھ چکے ہیں تو انھیں ایک نئی پوسٹ میں ایک بار پھر سے اپڈیٹ کر دیں، تاکہ نئے آنے والوں کو علم ہو سکے.

اس کے علاوہ ہفتہ بلاگستان کے آغاز پر فیس بک پر منظر نامہ کا صفحہ بنایا گیا ہے. آپ سب کو اس میں شرکت کی دعوت دی جاتی ہے، تاکہ آپ ہفتہ بلاگستان سے متعلق اپڈیٹس کے بارے میں باخبر رہ سکیں. فیس بک پر منظر نامہ کے صفحے پر شامل ہونے کے لیے یہاں کلک کریں.

ایک ہفتہ میں :

پہلا دن : یوم بچپن ۔ ۔ ۔ (ہم سب اپنے اپنے بچپن کا کوئی یاد گار واقعہ شیئر کریں اپنے اپنے بلاگ پر)

دوسرا دن : یوم ٹیگ / فی البدیہہ ٹیگ ۔۔۔ یعنی کوئی ایک آسان سا ٹیگ سلسلہ ہوں اور تمام بلاگرز ٹیگ جواب لکھیں اپنے اپنے بلاگ پر

تیسرا دن : یوم تعلیم ۔ ۔ ۔ یعنی اسکول ، کالج ، یونیورسٹی یا اردگرد سے تعلیمی حوالے سے کوئی سی بھی عام سی بات ، خیال یا منفرد یاد اپنے بلاگ پر شیئر کر سکتے ہیں اور اگر یوم تعلیم کو مکمل سنجیدہ شکل دینا چاہیں تو تعلیم کے حوالے سے کوئی موضوع رکھا جا سکتا ہے جس پر سب لکھیں ۔

چوتھا دن : یوم آج ۔ ۔ ۔ اس دن کیا کیا جائے ؟ کیا موضوع ہو ؟ یا پھر اردو بلاگ دنیا کو آپس میں مربوط کرنے کے لیے ڈسکشن ڈے رکھنا چاہیے اردو بلاگ دنیا کے مسائل کو فوکس کیا جائے۔ ۔ ۔ تمام بلاگ دنیا کا بہتر باہمی رابطہ ۔ ۔ ۔ کیا اردو بلاگ دنیا کو کسی ضابطہ اخلاق کی ضرورت ہے ؟

پانچواں دن : یوم باورچی خانہ ۔ ۔ ۔ سب بلاگرز کو کھانے پینے سے کچھ زیادہ ہی دلچسپی ہے تو سب بلاگرز کوئی سی بھی ایک ڈش خود بنائیں اور اس کی ترکیب اور تصویر شیئر کریں بلاگ پر۔ ۔ ۔ اور یہ بھی بتا سکتے ہیں کہ اس ڈش کو چکھنے اور کھانے والوں پر کیا کچھ بیت گئی

چھٹا دن : یوم مزاح ۔ ۔ ۔ بلاگرز کوئی مزاحیہ تحریر لکھیں بلاگ پر

ساتواں دن : یوم فوٹو گرافی

ماہ اپریل 2009 کے اوائل ہی میں شعیب صفدر نے اطلاع دے دی تھی کہ حکومتِ سندھ کے زیرِ اہتمام نیشنل بلاگرز کانفرنس کا انعقاد ہونے جارہا ہے جس میں اردو بلاگنگ کے حوالے پریزنٹیشن پیش کی جائے تو خوب رہے۔ اس سلسلے میں ہماری پہلی ملاقات کیفے نوبہار میں ہوئی جس میں مجھ سمیت شعیب صفدر، ابوشامل، نعمان یعقوب نے شرکت کی۔اس ملاقات میں چند ایسے بنیادی نکات جمع کیے گئے جن کے تحت پریزینٹیشن تیار کی جانی تھی۔ طے پایا کہ پہلے پریزینٹیشن کے تمام نکات باہمی مشورے سے طے کیے جائیں گے اور پھر ان کو ابوشامل اور میں پریزینٹیشن میں ڈھالیں گے۔

ہوا کچھ یوں کہ باقی سارے احباب تو بذریعہ ای۔میل رابطے میں رہے لیکن میں، اول اپنے دادا کی وفات اور دوم انٹرنیٹ سے رابطہ منقطع ہوجانے کے سبب میں پریزینٹیشن کی تیاری میں کسی قسم کی مدد تو درکنار، صورتحال سے باخبر بھی نہ رہ سکا۔ یہاں تک کہ کانفرنس سے ایک یوم قبل یعنی بروز جمعہ، نعمان یعقوب کے ہاں ملاقات طے پائی۔ حسبِ سابق، اس بار بھی ملاقات میں، مجھ سمیت شعیب صفدر، ابوشامل اور نعمان یعقوب شامل تھے۔ ابوشامل پاور پوائنٹ پر پریزینٹیشن تیار کرچکے تھے۔ نعمان کے ہاں بیٹھ کر تھوڑی بہت تبدیلیاں کی گئیں، اضافے کیے گئے اور طے پایا کہ پریزینٹیشن صرف اور صرف میں پیش کروں گا۔ حالآنکہ اس سے پہلے یہ کہا گیا تھا کہ میرے ساتھ نعمان بھی شامل رہیں گے۔

رات ساڑھے دس/ گیارہ بجے جب میں گھر پہنچا تو ارادہ اگرچہ یہی تھا کہ تھوڑی مشق کرلوں گا لیکن دن بھر کی تکان کے بعد ہمت بالکل نہیں رہی تھی لہٰذا ایک آدھ بار پریزینٹیشن دیکھ کر بند کردی اور پانی ڈال کر تازہ دم ہوا اور بستر پر۔

اگلے دن یونیورسٹی چلا گیا۔ وہاں کوئی کلاس نہیں ہونی تھی۔ صرف ’’تعلیم‘‘ کی کلاس میں ایک گروپ کی پریزینٹیشن تھی۔ سوچا کہ اس پریزینٹیشن سے شاید مجھے کچھ مدد مل جائے۔ وہ پریزینٹیشن بس مناسب تھی۔ وہاں سے دفتر چلا آیا۔ ایک ڈیڑھ گھنٹہ میں نے اس پریزینٹیشن کو دیکھا، الگ سے کچھ نکات کی تفصیل بھی لکھ لی۔ تین بجے کے قریب فہیم اسلم کا فون آیا کہ وہ ریگل چوک پہنچ چکا ہے۔میں دفتر سے نکل کر اس کے پاس پہنچا اور ہم بذریعہ رکشہ سواری، ریجنٹ پلازا پہنچ گئے۔

کانفرنس کا احوال

ریجنٹ پلازا کے کوہِ نور ہال میں نیشنل بلاگرز کانفرنس کا اہتمام کیا گیا تھا۔ جب ہم (میں اور فہیم) ہال میں داخل ہوئے تو چالیس سے پچاس افراد موجود تھے۔ ہم نے بھی ایک میز سنبھال لی۔ ماوراء کی تجویز تھی کی منظرنامہ پر باقاعدہ اپ۔ڈیٹ کیا جاتا رہے۔ اول میں نے ٹوئٹر سے بذریعہ موبائل فون کنیکٹ ہونے کی بہت کوشش کی لیکن اس میں ناکامی رہی۔ isms.pk کی سائٹ میرا اسٹیٹس بروقت اپ۔ڈیٹ نہیں کررہی تھی۔ دوسری کوشش میری یہ تھی کہ ماوراء کو براہِ راست اپڈیٹ کرتا رہوں۔ اس کے لیے مجھے یوفون کی سِم کا سہارا تھا لیکن یوفون نے ہمیشہ کی طرح اس بار بھی دغا کی۔ میں نے چار پیغامات بھیجے جو کہ میری طرف سے روانہ ہوئے بھی لیکن ماوراء کو ایک بھی موصول نہ ہوسکا۔ لہٰذا بروقت باخبر کرنے کے تمام تر منصوبے دھرے کے دھرے رہ گئے۔

شرکا آمد کا سلسلہ اگرچہ کافی پہلے سے شروع ہوگیا تھا لیکن مہمانوں کے انتظار میں کانفرنس اپنے مقررہ وقت ۴ بجے کے بجائے ایک گھنٹہ تاخیر سے یعنی ۵بجے شروع ہوئی۔ کانفرنس کے مہمانِ خصوصی وزیر آئی ٹی برائے حکومتِ سندھ جناب رضا ہارون صاحب تھے۔ اس کے علاوہ معروف صحافی ارد شیر کاؤس جی بھی اسٹیج پر موجود تھے۔

کانفرنس کا آغاز تلاوتِ کلامِ مجید فرقانِ حمید سے کیا گیا۔ بعد ازاں گیارہ سال کی عمر میں مائیکروسوفٹ سے سرٹیفکیٹ حاصل کرنے والی طالبہ عمیمہ عادل کو بلایا گیا۔ صوبائی وزیر رضا ہارون نے بتایا کہ چند دن پہلے جب عمیمہ عادل ان کے دفتر آئی اور انہوں نے اسے پیش کش کی کہ اپنی مرضی کا تحفہ مانگ لو تو اس نے لیپ ٹاپ کی خواہش ظاہر کی جسے انہوں نے فوراً قبول کرلیا۔ لہٰذا عمیمہ عادل کو تالیوں کی گونج میں لیپ ٹاپ کا تحفہ دیا گیا۔

اس موقع پر عمیمہ عادل نے بتایا کہ وہ شروع سے نعت خوانی کیا کرتی تھی۔ لوگ کہا کرتے تھے کہ یہ پڑھائی میں اچھی نہیں ہوگی لیکن وہ نعت خوانی کے ساتھ ساتھ پڑھائی میں بھی ہمیشہ بہت اچھی رہی۔ ایک رات اس کی والدہ نے خیال ظاہر کیا کہ لوگوں کی باتیں غلط ثابت کرنے کے لیے اُسے آئی ٹی کے شعبہ میں کچھ کرنا چاہیے۔ اس حوالے سے سرسید انجینئرنگ یونیورسٹی کے استاذ جناب اسد اللہ صاحب کی عمیمہ نے تعریف کی جنہوں نے بہت مدد کی اور اسے اس قابل کیا۔

بعد ازاں عمیمہ عادل نے مشہور نغمہ ’’یہ وطن تمہارا ہے تم ہو پاسباں اس کے‘‘ کے کچھ بول بھی گنگنائے۔ ارد شیر کاؤس جی نے بھی بے حد سراہا۔ اس موقع پر کانفرنس کچھ سیاسی رنگ اختیار کرگئی جب صوبائی وزیر رضا ہارون نے جذباتی انداز میں یہ کہا کہ سوات کے علاقے میں لڑکی کو کوڑے مارنے والے، لڑکیوں کے اسکول بند کرانے والے ظالم دیکھ لیں کہ ہماری لڑکیاں اتنی باصلاحیت ہیں، کیا وہ ایسی لڑکیوں کا مستقبل تاریک رکھنے کے لیے انہیں تعلیم سے دور کررہے ہیں۔

پونے چھ بجے کانفرنس کی پہلی مقررہ جہان آرا کو دعوت دی گئی۔ انہوں نے اپنا بلاگ شروع کرنے کے اسباب بیان کیے اور ان موضوعات کا ذکر کیا جن پر لکھنا انہیں پسند ہے۔ انہوں نے معاشرے کی اس روایت پر افسوس کا اظہار کیا کہ لڑکیوں کو تعلیم میں پیچھے رکھ جاتا ہے اور ان کے مطابق یہی چیز ان کے بلاگ شروع کرنے کا محرک بنی۔

اس کے بعد عمار یاسر کو دعوت دی گئی۔ عمار نے اپنے چائے کے ڈھابے کا ذکر کیا اور اس پر شائع ہونے والی تحاریر کے موضوعات اور ان کے اعداد و شمار پیش کیے۔

اس کے بعد مائک، اسٹیج پر بیٹھے ارد شیر کاؤس جی کے حوالے کیا گیا۔ انہوں نے اپنے مخصوص انداز میں پہلے تو کانفرنس کی ضرورت، وجوہات اور اہمیت پر سوال جڑ دیا اور اپنے برابر میں بیٹھے رضا ہارون صاحب سے استفسار کیا کہ اگر وہ انہیں کچھ سمجھا سکیں۔ وزیر آئی ٹی رضا ہارون نے کانفرنس کے اسباب اور اہمیت پر روشنی ڈالی لیکن کاؤس جی اس سے مطمئن نہ ہوئے۔اِدھر اُدھر کی بات کرتے ہوئے انہوں نے اپنا تکیہ کلام ’’سالا‘‘ استعمال کیا لیکن فوراً ہی اس پر معذرت بھی کرلی۔ اس وقت دلچسپ صورتِ حال پیدا ہوگئی جب اپنے برابر میں متحدہ قومی مومنٹ کے وزیر کی موجودگی کے باوجود یہ کہا: ’’میں ایم کیو ایم کے بارے میں کچھ کہنا چاہوں گا کہ ایم کیو ایم میری پسندیدہ جماعت نہیں ہے۔‘‘ اس پر رضا ہارون زیرِ لب مسکراتے رہے۔ تاہم کاؤس جی نے ایم کیو ایم کے ڈپٹی پارلیمانی لیڈر فاروق ستار کے اس مؤقف کی حمایت کی جو انہوں نے قومی اسمبلی میں نفاذِ عدل پر اپنایا۔

کاؤس جی کے بعد ڈاکٹر عواب علوی کو دعوت دی گئی۔ ڈاکٹر عواب نے فریڈم آف اسپیچ کے موضوع پر تقریر کی۔ متنازعہ کارٹونز شائع ہونے کے بارے میں ڈاکٹر عواب کا مؤقف تھا کہ اس ایشو کو خاص مقاصد حاصل کرنے کے لیے اچھالا گیا اور عوام نے اپنے ہی ملک کی املاک کو نقصان پہنچا کر احتجاج کیا۔

رملا اختر نے بھی بلاگنگ کے حوالے سے پریزینٹیشن دی۔ دیگر کئی بلاگرز نے بھی اپنے خیالات کا اظہار کیا۔ نظامت کے فرائض علی کے چشتی اور رابعہ غریب نے انجام دیے۔ کانفرنس کے درمیان ڈاکٹر فاروق ستار صاحب بھی تشریف لے آئے۔ ڈاکٹر فاروق ستار کی تقریر کانفرنس کی سب سے طویل تقریر تھی جس میں انہوں نے بلاگنگ، انٹرنیٹ اور ٹیکنالوجی کی ضرورت پر زور دیا۔

راجا اسلام کی پریزینٹیشن سب سے زیادہ دلچسپ تھی۔ راجا تصویری (فوٹو) بلاگر ہیں۔ آپ نے اپنے بلاگ کے محفوظات سے کچھ دلچسپ اور یادگار تصاویر پیش کیں جن کے پیچھے ایک کہانی تھی اور یہ تصاویر معاشرے کا کوئی نہ کوئی پہلو اجاگر کرتی تھیں۔

سب سے آخر میں، اردو بلاگنگ کے حوالہ سے ہماری پریزینٹیشن تھی۔ اگرچہ وقت بہت کم تھا، فاروق ستار کی طویل اور کچھ حد تک بے مقصد تقریر کانفرنس کا خاصا وقت لے چکی تھی اور اب انہیں ہی جانے کی جلدی تھی۔ لہٰذا جلدی جلدی میں اردو بلاگنگ کے حوالے سے میں نے اپنی پریزینٹیشن کے چند نکات پیش کیے اور یوں کانفرنس اختتام پذیر ہوئی۔

آخر میں چائے کے ساتھ کچھ لوازمات پیش کیے گئے تھے۔ اس دوران چند بلاگرز اور دیگر افراد نے آکر اردو بلاگنگ کے حوالے سے معلومات حاصل کیں۔۔۔ جس کے بعد ہم اپنے اپنے مقامات کو لوٹ گئے۔

میرے خیال میں نیشنل بلاگرز کانفرنس کا انعقاد خوش آئند ہے اور یہ ایک اچھی تقریب تھی لیکن بہرحال گوگل پاکستان اور سی آئی او پاکستان کے زیرِ اہتمام ہونے والے کراچی بلاگرز میٹ اپ سے زیادہ اچھی نہیں تھی۔ حکومتِ سندھ کے زیرِ اہتمام ہونے کے باوجود پریس/ میڈیا کی کوریج دیکھنے میں نہیں آئی۔

کانفرنس کے بارے میں دیگر بلاگرز کی تحاریر:
شعیب صفدر
ابوشامل
م۔م۔ مغل
ڈاکٹر عواب علوی
کراچی میٹرو بلاگ
عمار
فیصل کے
پرو پاکستان

کانفرنس میں جو اردو بلاگنگ کی پریزنٹیشن دی گئی، وہ آپ نیچے دئیے گئے لنک پر دیکھ اور ڈاؤنلوڈ کر سکتے ہیں۔

جیسا کہ آپ کو معلوم ہی ہے کہ آج کراچی پاکستان میں پہلی نیشنل بلاگرز کانفرنس منعقد کی گئی تھی۔ جس کا انعقاد آئی ٹی ڈپارٹمنٹ آف سندھ وزیر محمد رضا ہارون نے کروایا تھا۔کانفرنس کے آغاز کا وقت چار بجے تھا لیکن باقاعدہ آغاز 5 بجے کے قریب کیا گیا۔
ایسی کانفرنس کا ایجنڈا کیا ہو سکتا ہے، یہ آپ لوگ اندازہ تو لگا ہی سکتے ہیں۔ ظاہری بات ہے کہ پاکستان میں بلاگنگ کے مقام یا بلاگرز کے مسائل یا پھر کچھ تجاویز و آراء سے متعلقہ ہی ہونا چاہیے۔ لیکن یہ سوال پوچھنے پر ہمارے چند ایک بلاگر ساتھیوں کی طرف سے کچھ تنقید سامنے آ رہی ہے۔ اس کے بارے میں کچھ تفصیل اگلی پوسٹ میں شامل کی جائے گی۔ ابھی میری ایک بلاگر سے اس بارے میں بات ہوئی ہے، باقی بلاگرز کے خیالات جاننے کے بعد اس پر مزید کچھ لکھا جائے گا۔

اس کانفرنس کے مہمانِ خصوصی میں ڈاکٹر فاروق ستار اور ارد شیر کاؤس جی شامل تھے، جبکہ دیگر اہم شخصیات میں وزیر محمد رضا ہارون اور بلاگرز میں سے ڈاکٹر اعواب علوی شامل تھے۔
کانفرنس میں صرف کراچی کے بلاگرز نے شرکت کی، جبکہ پاکستان کے کسی دوسرے شہر سے کوئی بلاگر موجود نہیں تھا۔ اردو بلاگرز میں سے شعیب صفدر، ابو شامل، فہیم، عمار ، نعمان یعقوب، م م مغل اور شکاری (زاہد) نے شرکت کی۔ اگر تعداد کے حوالے سے بات کی جائے تو تقریباً 300 سے 350 تک لوگ اس کانفرنس میں موجود تھے۔ زیادہ تر تعداد 20 سے 30 سال کے درمیان کے لوگوں کی تھی۔

صرف چند منتخب لوگوں کو کانفرنس میں بات کرنے کا موقع دیا گیا، جس میں ڈاکٹر اعواب علوی اور جہاں آراء قابلِ ذکر ہیں۔ بلاگرز کو سوالات کرنے کا موقع نہیں دیا گیا۔ صرف 3 لوگوں نے ڈاکٹر فاروق ستار سے سوالا ت کیے تھے۔ جن میں ایک سوال یہ تھا کہ” ہمارے ملک کے صدر کی اگر ویب سائٹ دیکھی جائے تو وہاں ان کا صرف بائیو ڈیٹا ہے۔ جبکہ اگر امریکہ کے صدر کی ویب سائٹ دیکھی جائے تو وہاں آپ باقاعدہ سوال پوچھ سکتے ہیں اور صدر کی جانب سے باقاعدہ جواب دیا جاتا ہے۔ تو کیا یہ بہتر نہیں کہ گورنمنٹ جو اہم شخصیات کو پراڈو اور پجیرو گاڑیاں فراہم کرتی ہے اس کے بدلے ان کو ایک ایک لیپ ٹاپ دے دیا جائے۔ تاکہ عوام کے خیالات تو ان تک پہنچ سکیں۔”
اس سوال پر تالیاں تو خوب بجیں، لیکن ڈاکٹر فاروق ستار نے کوئی مثبت جواب نہیں دیا۔ یہی کہنے پر اکتفا کیا کہ ” کوشش کریں گے کہ اس قسم کی ایک سمری بنا کر آگے پیش کرسکیں۔”

اب آپ سوچ رہے ہوں گے کہ اردو بلاگنگ کے حوالے سے اس کانفرنس میں کیا بات چیت ہوئی تو اردو بلاگرز کو زیادہ بولنے کا موقع نہیں دیا گیا۔ صرف کچھ لمحات دیے گئے جس میں عمار نے جلدی میں اردو بلاگنگ کے حوالے سے یہ بتایا کہ “اردو بلاگنگ آسان ہے اسی طرح جیسے انگریزی بلاگنگ۔ اور پاکستان میں زیادہ اکثریت اردو جاننے والوں کی ہے نہ کہ انگریزی جاننے والوں کی تو کیا یہ بہتر نہیں کہ ہم بجائے انگریزی کے اردو میں بلاگنگ کریں۔ تاکہ ہماری عوام کو فائدہ پہنچ سکے۔۔۔۔۔”

کانفرنس تقریباً تین گھنٹے تک جاری رہی، انتظامیہ کی طرف سے پاکستان میں بلاگنگ کو فروغ دینے کی کوئی تجویز یا اقدامات اٹھانے کی کوئی بات سامنے نہیں آئی، اب تک جس بلاگر سے میری بات ہوئی، ان کا کہنا ہے کہ اس کانفرنس کو ایک کامیاب کانفرنس نہیں کہا جا سکتا۔ اس کے علاوہ پاکستان کے کسی اور شہر میں اس قسم کے کسی ایونٹ کے منعقد کروانے کی بات بھی نہیں کی گئی۔ لیکن ان کا خیال یہ بھی ہے کہ جس طرح پہلے گوگل والوں نے منعقد کرائی تھی۔ اس طرح شاید پھر کوئی اور کمپنی کروائے۔ اور امید ہے کہ حکومتی سطح پر بلاگرز کے لیے کچھ نہ کچھ اقدام ہوں گے۔ آغاز تو ہو چکا ہے، اب دیکھیے آگے کیا ہوتا ہے۔

ہماری کوشش ہو گی کہ اس کانفرنس کے بارے میں آپ تک مزید تفصیلات پہنچائی جا سکیں۔ عمار کے پاس مکمل تفصیلات ہوں گی، امید ہے کل تک عمار پوسٹ کر دے گا۔ اور باقی بلاگرز سے بھی کچھ معلومات ملنے پر منظر نامہ پر اپڈیٹ کر دیا جائے گا۔

فی الحال کچھ تصاویر بھی حاضر ہیں، جو ہم نے شعیب صفدر سے حاصل کی ہیں۔ مزید تصاویر یہاں ملاحظہ کیجیے۔

نوٹ: اس تحریر کی معلومات نا مکمل ہیں، اور ممکن ہے کہ اس میں کچھ درست بھی نہ ہو۔ کیونکہ یہ تفصیل ابھی صرف ایک بلاگر سے ہی مل سکی ہے۔ مزید اور مکمل تفصیل دوسرے بلاگرز سے جان کر پوسٹ کی جائے گی۔

میرے اندازے کے مطابق اردو بلاگنگ کا آغاز تقریباً چھ سال قبل ہوا تھا۔ عمیر سلام کے متعلق کہا جاتا ہے کہ انہوں نے انٹرنیٹ کا پہلا اردو بلاگ سیٹ اپ کیا تھا۔ یہ وہ زمانہ تھا جب بی بی سی اردو ڈاٹ کام کی سائٹ کو چھوڑ کر انٹرنیٹ پر تحریری شکل میں اردو تقریباً ناپید تھی۔ اگرچہ اس وقت بھی اردو کے حوالے سے متعدد ویب سائٹس موجود تھیں، لیکن ان سب پر تصویری یا رومن (انگریزی حروف میں لکھی گئی) اردو کا استعمال مروج تھا۔ تصویری یا رومن اردو کی اہمیت اپنی جگہ ہے اور اردو سے محبت کرنے والے انہی فارمیٹس کو استعمال کرکے کسی طور انٹرنیٹ پر اردو کی موجودگی کا احساس دلاتے رہے ہیں۔ لیکن جہاں گزشتہ ایک عشرے سے یونیکوڈ ٹیکنالوجی کا فائدہ اٹھاتے ہوئے تحریری شکل میں عربی اور فارسی مواد پر مشتمل ہزاروں ویب سائٹس وجود میں آ گئیں تھیں، وہاں انٹرنیٹ پر اردو مواد کی کمیابی اردو دان طبقے کے لیے لمحہ فکریہ تھا۔ ایسے میں اردو بلاگز کے منظر عام پر نمودار ہونے سے یہ امید پیدا ہو گئی تھی کہ اس طرح کم از کم کسی طور انٹرنیٹ پر اردو کے فروغ کی ایک راہ نکل آئے گی۔

چھ سال کا عرصہ انفارمیشن ٹیکنالوجی کے اعتبار سے ایک طویل مدت ہے اور اتنے عرصے میں کئی ٹیکنالوجیز کا استعمال متروک ہوجاتا ہے اور بے شمار نئے معیارات اور ایجادات سامنے آجاتی ہیں۔ چھ سال کے عرصے میں دنیا بھر میں براڈ بینڈ انٹرنیٹ کا استعمال نہایت تیزی سے بڑھا اور اس کا اثر پاکستان اور انڈیا پر بھی پڑا ہے جہاں بہت سے لوگوں نے ڈائل اپ کی جگہ ڈی ایس ایل کا استعمال شروع کر دیا ہے۔ انٹرنیٹ کنکشنز کی بینڈ وڈتھ بڑھنے کے ساتھ ساتھ ویب پر ملٹی میڈیا مواد بھی کثرت سے پیش کیا جانے لگا ہے اور یوٹیوب سمیت متعدد ویڈیو ہوسٹ منظر عام پر آ گئے ہیں۔ اس کے ساتھ ہی سوشل نیٹورکنگ سائٹس کی مقبولیت میں بھی بہت اضافہ ہوا ہے۔ وقت گزرنے اور ٹیکنالوجی کی پیشرفت کے ساتھ ساتھ اردو بلاگنگ سے وابستہ توقعات بھی کچھ بدل گئی ہیں۔ شروع میں کسی اردو بلاگ کا آغاز ہونا اور فعال رہنا ہی غنیمت جانا جاتا تھا، لیکن اب اردو بلاگرز سے یہ توقع رکھی جاتی ہے کہ وہ بھی اپنے بلاگ پر فکر انگیز اور معلوماتی تحاریر پیش کریں گے۔ اور گزشتہ کچھ عرصے میں اس اعتبار سے مثبت پیشرفت بھی ہوئی ہے اور کئی اچھے ادبی اور معلوماتی اردو بلاگ لکھے جانے لگے ہیں۔

اگر گزشتہ چھ سال میں بلاگنگ کے ارتقاء کا جائزہ لیا جائے تو نظر آتا ہے کہ جہاں انگریزی اور دوسری زبانوں کے بلاگز کی تعداد لاکھوں، بلکہ ملینز کے اعتبار سے بڑھی ہے، وہاں ابھی تک اردو بلاگز کی تعداد غالباً 100 بھی نہیں ہے۔ اس میں فعال اور غیر فعال بلاگ دونوں شامل ہیں۔ اگر صرف پاکستان کے بلاگنگ سین کا جائزہ لیا جائے تو میرے اندازے کے مطابق انگریزی بلاگ لکھنے والی پاکستانی بلاگرز کی تعداد ہزاروں میں ہوگی۔ میری نظر میں اردو بلاگنگ کے خاطر خواہ انداز میں ترقی نہ کرنے کی پہلی بنیادی وجہ خالصتاً تکنیکی ہے۔ میں ایک مرتبہ پہلے بھی متعدد بار عرض کر چکا ہوں کہ جب تک کمپیوٹر پر اردو کے ساتھ دوسرے درجے کے شہری کا سا سلوک کیا جائے گا، انٹرنیٹ پر اردو کی ترویج ایک خواب ہی رہے گا۔ اگرچہ کہنے کو مختلف آپریٹنگ سسٹمز میں اردو لکھنے پڑھنے کی سپورٹ موجود ہے لیکن ایک عام یوزر کے لیے آپریٹنگ سسٹم پر اردو کی سپورٹ فعال کرنا اور اس کے بعد اردو کی بورڈ انسٹال کرنا آسان مراحل ثابت نہیں ہوتے۔ ویب بیسڈ اردو ایڈیٹر اور ورڈپریس کے اردو ورژن کی دستیابی سے انٹرنیٹ پر اردو کا استعمال اور اردو میں بلاگ لکھنا قدرے آسان ضرور ہو گیا ہے لیکن حقیقی معنوں میں انفارمیشن ٹیکنالوجی کی دنیا میں اردو کو فروغ اسی وقت حاصل ہوگا جب آپریٹنگ سسٹمز میں اردو کی سپورٹ آؤٹ آف دی باکس موجود ہوگی۔

انٹرنیٹ پر اردو کے پیچھے رہ جانے کی ایک اور بڑی اور بنیادی وجہ یہ بھی ہے کہ اب لوگوں کو اردو کم کم ہی آتی ہے۔ زیادہ تر لوگ اردو کو بطور اختیاری مضمون ہی پڑھتے ہیں جس کی وجہ سے بھی انہیں اردو پر کم دسترس حاصل ہوتی ہے۔ اور انڈیا میں اردو کی حالت اس سے بھی زیادہ پتلی ہے۔

اردو بلاگز کی سست رفتار گروتھ کی ایک اور بڑی وجہ انٹرنیٹ پر اردو مواد کو شائع کرنے میں درپیش دشواری بھی رہی ہے۔ زیادہ تر اردو بلاگر بلاگسپاٹ یا ورڈپریس کے سٹائل میں تبدیلی کرکے انہیں اردو کے سانچے میں ڈھالنے کے بعد اردو بلاگ پبلش کرنے کے لیے استعمال کرتے رہے ہیں۔ اس طرح اردو بلاگنگ بڑی حد تک کمپیوٹر لٹریٹ طبقہ تک محدود رہی ہے۔ اسی لیے خاص ایک اردو بلاگ ہوسٹنگ سروس کی ضرورت ہمیشہ محسوس ہوتی رہی ہے جہاں اردو بلاگرز کو بنا بنایا اردو بلاگ مل جائے اور جہاں وہ بغیر کسی دقت کے اردو لکھ سکیں اور شائع کر سکیں۔ اگرچہ اس سلسلے میں کچھ اردو بلاگ ہوسٹ سامنے بھی آئے ہیں لیکن شاید ان سائٹس کے منتظمین اس قسم کی سروس کے لیے درکار ریسورسز کا درست طور پر ادراک نہیں کر سکے اور اب تک جتنے بھی اردو بلاگ ہوسٹ سامنے آئے ہیں، ان سب میں کم از کم ایک مرتبہ تمام بلاگز کا ڈیٹا کرپٹ یا ضائع ہو چکا ہے۔ اس قسم کی صورتحال بھی اردو بلاگرز کے لیے نہایت حوصلہ شکن ثابت ہوتی رہی ہے۔ اس لیے میری نظر میں اردو بلاگنگ کو فروغ دینے اور اس کی کریڈیبلیٹی بحال کرنے کے لیے ایک پائیدار اردو بلاگ ہوسٹنگ سروس بہت ضروری ہے۔ موجودہ اردو بلاگ ہوسٹنگ سائٹس کے منتظمین کو چاہیے کہ وہ اس سلسلے میں اپنی ذمہ داری کا بہتر ادراک کریں۔

اردو بلاگز کے فیڈ ایگریگیٹر

زکریا نے پہلی مرتبہ اردو سیارہ کے نام سے اردو بلاگز کا ایک فیڈ ایگریگیٹر سیٹ اپ کیا تھا۔ اردو سیارہ کی بدولت تمام اردو بلاگرز کی تحاریر کو ایک جگہ پر پڑھنا ممکن ہو گیا۔ اردو سیارہ نے اردو بلاگنگ کو مقبول بنانے میں اہم کردار ادا کیا ہے۔ بعد میں اردو ٹیک وینس اور چند دوسرے فیڈ ایگریگیٹر بھی بنائے گئے۔ عام طور پر اس طرح کے فیڈ ایگریگیٹرز میں بلاگ پوسٹس کی ایک یا دو سطریں نظر آتی ہیں اور باقی پوسٹ پڑھنے کے لیے متعلقہ بلاگ پر ہی جانا پڑتا ہے۔ لیکن چونکہ اردو بلاگز کی تعداد نسبتاً کم رہی ہے، اس لیے اردو بلاگز کے فیڈ ایگریگیٹر قدرے بڑا اقتباس یا پھر پوری پوسٹ شامل کرتے رہے ہیں۔ اس کا اثر یہ سامنے آیا ہے کہ اردو سیارہ اور اس طرح کی دوسری سائٹس فیڈ ایگریگیٹر سے زیادہ ایک فورم کی شکل اختیار کر گئی ہیں، یا کم از کم اردو بلاگرز انہیں اسی انداز میں دیکھتے ہیں۔ منظرنامہ کی ایک پوسٹ پر ایک صاحب نے تبصرہ کرتے ہوئے اسی بات کی نشاندہی کروائی تھی کہ اردو بلاگر قارئین سے زیادہ اب ایک دوسرے کے لیے لکھتے ہیں۔ میرے خیال میں یہ بات قابل غور ہے۔ حال ہی میں اردو سیارہ میں ایک بلاگ کی شمولیت کے حوالے سے کچھ شکایات سامنے آئی تھیں، وہ بھی غالباً اسی وجہ سے تھیں کہ شاید اردو بلاگر اردو سیارہ اور اردو ٹیک وینس کو محض فیڈ ایگریگیٹر کی بجائے ایک فورم کے طور پر دیکھتے ہیں۔

اردو بلاگنگ کے فروغ کے لیے تجاویز

میں یہاں اردو بلاگنگ کو فروغ دینے اور اس کی مقبولیت میں اضافہ کرنے کے سلسلے میں چند تجاویز بھی پیش کروں گا۔ اس سلسلے میں میری پہلی تجویز یہ ہے کہ لوگوں کو اردو بلاگنگ کی طرف لانے کی فعال کوشش کی جائے۔ اس کی مثال اردو ٹیک پر محب علوی کا لوگوں کو اردو بلاگنگ کی طرف لانا ہے جس کے نتیجے میں کئی بہترین اردو بلاگ وجود میں آئے ہیں۔ میرے خیال میں انہی لائنز پر چلتے ہوئے مشہور پاکستانی بلاگرز، جو کہ انگریزی میں بلاگ لکھتے ہیں، کو اردو بلاگ لکھنے کی دعوت دی جانی چاہیے۔ مغربی میڈیا کے اکثر کالم نویس اور تجزیہ نگاروں کی اپنی ویب سائٹس اور بلاگ موجود ہیں جبکہ اردو میں اس طرح کی کوئی ویب سائٹس یا بلاگ دیکھنے کو نہیں ملتے۔ میرے خیال میں اگر مشہور کالم نویسوں کو اردو بلاگ لکھنے پر آمادہ کیا جائے تو اس سے بھی اردو بلاگنگ کی مقبولیت اور کریڈیبیلیٹی میں خاطر خواہ اضافہ ہو سکتا ہے۔ گزشتہ سال پاکستان میں میری مشہور کالم نگار اوریا مقبول جان سے ملاقات ہوئی تھی اور میں نے انہیں اردو بلاگ لکھنے کا کہا تھا اور انہوں نے اس میں دلچسپی بھی ظاہر کی تھی۔ میرے خیال میں کچھ کالم نویس خواتین و حضرات کو محض بلاگ ہی نہیں بلکہ علیحدہ ڈومین اور ویب سپیس آفر کی جانی چاہیے۔ اگر شروع میں کچھ اردو کالم نویس حضرات نے بھی بلاگ لکھنا شروع کر دیا تو اس سے باقی صحافیوں کو بھی تحریک ملے گی۔ اردو بلاگ ہوسٹنگ سائٹس کے منتظمین کو اس جانب بھی توجہ کرنی چاہیے۔

موضوعاتی بلاگ

آخر میں میں موضوعاتی بلاگ لکھنے کی تجویز کے بارے میں کچھ عرض کرنا چاہوں گا۔ یہ تجویز فیصل نے پیش کی تھی اور میری دانست میں یہ ایک نہایت عمدہ تجویز ہے، اگرچہ اس بارے میں کچھ غلط فہمی بھی دیکھنے میں آتی رہی ہے۔ موضوعاتی بلاگنگ کی تجویز کا مقصد اردو بلاگنگ کو کسی ضابطے کے تحت لانا نہیں ہے بلکہ یہ محض ایک تجویز ہے کہ ایسے اردو بلاگ سیٹ اپ کیے جائیں جہاں کسی ایک خاص موضوع پر معلوماتی تحاریر شائع کی جائیں، اور بہتر یہ ہوگا اگر کسی ایک موضوع میں دلچسپی رکھنے والے خواتین و حضرات ایک ہی بلاگ پر اپنی تحاریر شائع کریں۔ اس طرح اردو بلاگنگ کا ایک بہت تعمیری استعمال سامنے آئے گا۔ اردو میں موضوعاتی بلاگ پہلے سے موجود ہیں۔ اردو ویب بلاگ اس کی سب سے پرانی مثال ہے جہاں اردو کمپیوٹنگ سے متعلقہ موضوعات پر مبنی تحاریر پوسٹ کی جاتی ہیں۔ اس کے علاوہ منظرنامہ اور اردو ماسٹر بھی موضوعاتی بلاگ ہیں۔ ایسے بے شمار موضوعات ہیں جن پر بلاگ لکھنے کا سلسلہ شروع کیا جا سکتا ہے۔ ان میں حالات حاضرہ سے لے کر سائنس اور ٹیکنالوجی کے موضوعات شامل ہیں۔ میرے ذہن میں اردو ٹائپوگرافی کے حوالے سے ایک بلاگ کا آئیڈیا بھی موجود تھا جہاں اردو فونٹ سازی کے بارے میں معلومات فراہم کی جا سکیں۔ ٹائپوگرافی کے ماہرین کو اس موضوع پر ایک بلاگ ضرور سیٹ اپ کرنا چاہیے۔

اس مضمون میں میں نے انٹرنیٹ پر اردو کے فروغ میں اردو بلاگنگ کی اہمیت کو اجاگر کرنے کی کوشش کی ہے اور اردو بلاگنگ کی مقبولیت میں اضافہ کرنے کے لیے تجاویز پیش کی ہیں۔ میں امید کرتا ہوں کہ آپ دوستوں کو یہ تجاویز پسند آئیں گی اور اس سلسلے میں میں آپ کی جانب سے بھی تجاویز کا منتظر رہوں گا۔
خیر اندیش
نبیل حسن نقوی

ووٹ دینے کے لیے اس لنک پر بھی جا سکتے ہیں